Wydarzenia

 HISTORIĘ O OPIE OPOWIADA WNUK PAWEŁ.

"""Opowiym wom historia o chopie, kery w moich oczach boł prowdziwym bohaterym naszej Slonkiyj ojczyzny...
Godka o moim Opie (dziadku). Godom tu o chopie, kery przez cołkie życie, to może ze "trzi razy przeklnoł"( może trocha wiyncej ale nie wydowo mi sie).
Przeżoł on 82 lata i 26 grudnia tego roku pożegnoł się ze mnom i innymi z naszej familiy.
On, jak ftoś ino potrzebowoł pomocy to leciol bez zastanowienio... Niyważne boło, czy to somsiod z osiedla, czy z garażu, czy ftoś z dalsza. Kożdemu pomagoł jak ino iumioł.
Pamiyntom jak byłech bajtel, może miołech z osiem, możno 10 lot , to broł mie na łikyndy albo feryje abo na wakacje razem z siostrom i jeździli my na kołach, łazili w " dziwne" miyjsca na szpacery( ruiny kaj sie łon wychowoł), abo jechali na ryby na glinioki jak jeszcze wtedy boły.
Ale po kolei.
Jako bajtle jak my u nich byli na feryje to pamiytom wyjazdy na naszo wiocha i łażenie na sanki na górka, do lasu abo kulig łobmyślony przez niego i ujka dlo wszystkich ze wsi bajtli i zapiynte sanki za " Dużym Fiatem " Opy albo Skodom 120 od ujka.
Niezapomniano zabawa i kupa szpasu.
Pamiyntom jak budowali my lauba na ogródku i jak on som wnosioł cołkie drewno na ogródek na dach. Mioł w pierony siły.
Pamiyntom jak łaziol ze mnom na tor saneczkowy w jego kochanych Siemcach, w kerych się urodzioł i całe życie mieszkoł, w Pszczelniku i tam słynno scena z bydzie bolało!!( Zjecholech z gorki na dupolocie i jak duplech to brakło mi loddechu). Nie spanikowoł, ino podszedł i ciulnol mie w plecy bych nazot zaczął oddychać i pedzioł idź dalyj jeździć i się bawić. Ale na dupolocie miołech dość. Wolołech na sankach przeskakiwać opony kere mi som łon ukladol coroz to wyżej.
Pamiyntom, jak zrobiołech dzięki niymu karta wędkarsko, bo już miolech tyla lot, że musiołech miec swojo i wpodł na pomysł że pojadymy na kołach na Kozłowo Góra, zoboczyć jak tam z łowieniem(oj moja dupa od siodełka). Zrobili my z 50 km. Jemu nic niy boło, miol już z 65 lot a jo płakoł z obtartej rzici...
Na drugi dzień pedzioł jadymy, a jo panikowoł, że moja dupa drugi roz tego nie strzymo, to pojechali my autem. No i pamiętno plastikowo łódka na keryj my chytali, goronco łod słońca i moje błagania i powrót do dom juz.
Pamiyntom gra w pingponga w wielkiej izbie na stole gościnnym, kiedy Oma z bandaża nom siatka robiola i jej furia po całym dniu odbijanio tego pingla deskami do krojenio. Ja, to On zachenciol mie do gry w pingponga, co skutkowało małym trofeum na zawodach późnij.
Pamiyntom, jak na borki( zalano staro piaskownia) my jeździli się kompać i jak mie w konia zrobioł, że tam głymboko a siedziol na żici w wodzie. Ale potem z 2 lata później przepłynoł ze mnom cało szerokość bajora, choć mioł pieronowy strach.
Pamiyntom tyż niyzapomniano, tam rajza z Omom na grilla i cołki dziyń na słońcu, a Oma do kostek w wodzie ino boła, bo głębiej nie chciała.
Pamiyntom jak my jeździli na nocki na ryby z nim i Fatrym. Nic wielkiego my nie chycili, ale byli my razem i to się liczoło.
Pamiyntom też jak już my mieli inne zajyncia, bo bolech trocha starszy i widzołech że mu brakuje naszych odwiedzin i mu pedziołech, że jada po łachy do dom na kole i przyjada do nich na kilka dni i bydemy se na rybki jeździć. Ło pieronie!!! Ale się ucieszoł i pedzioł że nikaj nie byda jechoł na kole ino pojadymy autem.
Pamiyntom jak mie i siostra wzięli na wycieczka do Ustronia, co mieli ze swojego chóru, w kerym śpiewali cołkie życie i tam akcja mojej siostrzyczki na górce...
” -Krysia tam je na dole drzewo ino w nie nie wjedź...
- Ja dziadek, omina je... Kilka sekund i... AŁA!!!(prosto w drzewo)”
Pamiyntom jak nos ściągli do chóru żeby z nimi śpiewać i inne wycieczki np. na Ukraina do Truskawca i akcja z windom co nom wyłonczyli o 23.00 bo tam wszystko wyłonczali, nawet woda w kranie  
I moje wołanie: Dziadek ratuj!!!
Ufff.... Jakoś nos wydostali!
Abo wycieczka na Węgry i jak nos pilnowoł, by my za dużo wina nie wypiyli b byli my jeszcze smarkate.
Boła jeszcze słynno wycieczka z "dilajla".
Do Kalet jak mu gacie pękły, ale Oma zawsze ubezpieczono i miała nici przi sobie i go zaszyła na żywca
Potem już bolo inaczyj....
Pamiyntom jego i Omy opanowanie jak umarła moja matka, a ich jedyno cera.
Kiedy szybko w nocy przyjechali i kedy pedzioł, że ważne, że zdonżoł się z nią pożegnać jeszcze w doma...
Pamiyntom jak jechali my zawieźć siorka moja do Krakowa nazot na studia i jak się zapomnioł i w Krakowie wtargoł na skrzyżowanie na czerwonym ( wtedy roz zaklnal, ale się zaroz opanowoł).
Pamiyntom imprezy ale też i obowiązki na ogródku i kochane jego i Omy ogórki i tomaty. Nie mieli już tyla siły, ale to musiało rosnąć co roku!! Boły richtich dobre! Trowa cza boło też kosić i to boło zadanie dziadka. Nawet się z Reichu,kosiarka przywióz!
Pamiyntom jak już bołech starszy jak robiołech prawo jazdy i jak przyjezdzoł swoim kochanym autym "Palio Weekend",coby jechać ze mnom na plac manewrowy. Dużo mi to na pewno pomogło.
Pamiyntom jak ojciec mi kupioł pierwsze auto tzn Uno i mogłech som do nich jechać i jego słowa: łojciec ci doł to jeździj, ale mojego nie dostaniesz. Po pół roku normalnie dowoł.
Pamiyntom imprezy u nich kiedy siostra nie umiała przyjechać na łobiod urodzinowy i kozoł mi iść po auto, zatankować i po nia jechać. Zjadła, wypiola kawa i kozoł mi ją odwiyźć.
Pamiyntom,jak się cieszyłech, jak my im robiyli impreza na 50 lot po ślubie. Ustroili my ich auto jak dlo nowożeńców i jak żech wjyżdżoł po nich na osiedle, trąbiłech jak na weselu. Opa wyskoczoł i wołoł że mom kepa i zgupiołech, ale się radowali oba. A jak żech wjyżdżoł pod kościół, zrobiołech to samo.
Pamiyntom wyjazdy na naszo działka nad jezioro jak już łogródka my nie mieli i razem spędzony czas na rybach, wycieczkach na lody i inne rajzy.
Pamiyntom, jak się cieszyli jak prziszłech do nich z moją kochaną Anią ( teraz żona) i pedzieli my że bierymy ślub. Ale mieli oboje radocha!
Potem się urodzioł Janek. Mój pierworodny.
Jak boł chory, to nikaj mu nie boło tak dobrze, jak u nich! Oma dbała, by boło czysto w pieluszce, a Opa jak boło ciepło to zbieroł manele, tzn wòzyk z Jankiem i jazda maraton na osiedlu, nikaj im się tak fajnie nie drzemało jak na placu pod drzewem, w jego łogródku, pod oknami, a Oma ino co chwila zerkała, coby ich nikt nie porwoł...
Oboje łon i Oma nigdy nie patrzeli na piniondze! Zawsze jak umieli to pomogli!
I tak bolo aż do obecnych świat... Aż się Opa w drugie święto stracioł...
Boł fest osłabiony po ostatnich chorobie i z gruby fest go plecy bolały. Ważne, że sie już niy męczy..."""